LEGAZPI CITY—Mahigot na pigkontra kan grupong Amihan National Federation of Peasant Women an paglansar nin Balikatan military exercises na nagpuon kan Abril 20 asin madurar hasta Mayo 8, 2026.
Segun ki Amihan National Federation of Peasant Women Chairperson Zen Soriano, sa intrevista kan Bombo Radyo Legazpi, sainda ining pigkontra urog na ngunyan na nasa tahaw kan krisis asin naghahangad nin giyera an Estados Unidos sa Middle East.
Ipigkahandal kan opisyal na baka makaladkad kan US an Pilipinas para sa saindang kamawotan na maglansar nin manlaen-laeng giyera.
Pigkahaditan man niya na pwedesir mapuruhan o madamay an Pilipinas kan ibang nacion urog na kun may kaiwal an Estados Unidos huli sa digdi isasagibo kaini an mga ‘chips’ asin ibang materyales.
Sinabi pa kan opisyal na naiistorbo an paghahanapbuhay kan mga parasisira o paraooma sa mga lugar na piglalansaran kan siring na aktibidad.
Afuera digdi, pwedesir man na maraot an mga korales kan kadagatan huli kan langis na naglalakop gikan sa barko na pigggamit sa military exercises.
Tinawan-doon man ni Soriano na dapat manindugan an gobierno sa kun ano an sakop kan Pilipinas asin dae ipaglaom na idedepensa an nacion kan Estados Unidos huli sa an kamawotan sana suboot kaini an mapakanibangan an teritoryo para sa saindang negosyo.
