Hinatulan na kan korte nin 15 taong pagkakakulong an ama kan sarong teenager na responsable sa mass shooting sa sarong high school sa Georgia, U.S.A kan 2024 na ikinagadan nin apat katawo.
Si Colin Gray, 55-anyos, an nahatulang guilty makalihis mapatunayan na nagpabaya asin itinao sa saiyang aki na si Colt Gray an badil na ginamit sa insidente.
Enot nang sinentensiyahan si Colt Gray, na ngunyan an 16-anyos na, nion habambuhay na pagkakakulong na warang posibilidad nin parole huli sa pambabadil sa eskwelahan.
Segun ki Judge Nicholas Primm, alagad dae matatawaran an kulog na kawsa kan trahedya sa mga biktima asin sa saindang pamilya, kaipuhan man liwat an suway na paninimbagan kan ama sa mismong krimen na ginibo kan saiyang aki.
Napag-araman na pinaka enot sa Georgia na hinatulan nin second-degree murder an sarong magurang huli sa mass shooting na ginibo kan saiyang aki.
Segun sa mga prosecutor na igwa na nin palatandaan na igwang madahas na pag-uugali an binatilyo antes pa man an pambabadil, alagad dae ini natawan nin bastanteng atensyon kan saindang magurang, imbes na garing kinonsinte pa an pagigin bayolente kan saindang aki.
Padagos man na pigagamit kan mga prosecutor sa Estados Unidos an mga siring na legal na lakdang ngani na papanimbagon an mga pinagtutubudan na nagpabaya sa pagpapadakula sa saindang mga aki urog na sa pag-handle nin badil, bilang parte kan pagpuho sa naglalalang school shooting incident sa nacion.
