LEGAZPI CITY – Kinondena kan grupong Alliance of Concerned Teachers an panibagong insidente nin red tagging sa mga aktibista asin ralihista.
Kasunod ini kan pananao nin mga pamphlets sa isinagibong seminar sa Taytay Senior High School sa Rizal kung sain mahihiling an mga komiks na nagsasabing may mga ralihista an nangri-recruit nin mga estudyante nganing maging miyembro kan teroristang grupong New People’s Army.
Sa intrevista kan Bombo Radyo Legazpi kay Vladimer Quetua an Chairperson kan Alliance of Concerned Teachers, bakong magayon an pigpapaluwas na mensahe kan pamphlets na garong nagsasabing mga terorista na an mga nagsasabay sa hiro protesta.
Segun kay Quetua, dae ninda papalampason an red tagging na ini lalo pang an mga joven an naiimpluwensyahan.
Mawot na maaraman kan grupo kung sisay an nasa likod kan pananao ninn pamphlets asin mawot man na mahagadan nin eksplinasyon an Department of Education.
Nanindugan man an grupo na dae nin sala sa pagsasagibo nin hiro protesta kung ipapahayag sana an mga pagkontra asin pangapudan sa gobyerno lalo pang parte man ini kan satong derecho bilang mga Pilipino.
