LEGAZPI CITY — Ipinagsugo na kan Sandiganbayan an pagsuspinder sa alkalde kan banwaan kan Malinao sa Albay sa laog nin tulong bulan katakod kan kasong graft asin corruption na isinangat kontra digdi.
Nag-ugat an nasambitan na reklamod sa pagpapagtugdok kan cockpit arena sa lugar na isinangat ni municipal councilor Irene Fajut kan 2013 makalihis na akusaran si Mayor Avelino “Billy” Ceriola nin conflict of interest asin dae nin business permit an nasambitan na negosyo.
Martes pa kan maresibe ni Ceriola an kopya kan 90-day suspension order na pirmado ni Associate Justice Rodolflo Ponferrada bilang chairperson na kinoncur man ninda Associate Justices Oscar Herrera Jr. asin Karl B. Miranda.
Nakapalaman digdi an pagbabawal sa alkalde na mag-perform o mag-exercise kan obligasyon, mga trabaho asin prebilehiyo kaini bilang sarong municipal mayor.
Mientrastanto, nakatalaan na mag-file nin motion for reconsideration sa Sandiganbayan an nasambitan na alkalde katakod kan pagtataong duon na ligal an pagpapatugdok kan arena asin dae nin walang mangyayaring conflict of interest huli ta an saiyang pamilya an nagpapadalagan kaini asin bako an saiyang personal na negosyo.
Ipagpapadagos man suboot ni Ceriola an trabaho para sa mga tawo sagkod sa dae nagbababa nin kasuguan an Department of Interior and Local Government (DILG.)
