Pighayag kan abogado ni dismissed Bamban Tarlac Mayor Alice Guo na si Atty. Nicole Jamilia na pinag-iisipan kan pinatalsik na alkalde kun magsusunad ini nin kandidatura para sa 2025 National and Local elections.
Segun ki Atty. Jamilia na pigkokunsiderar ni Guo kun papano mangyayari an pagsusunad kaini nin Certificate of Candidacy para sa masunod na pirilian ngunyan na naka-detine ini.
Pigkokunsiderar man suboot ni Guo an mga “unresolved issues” sa Bamban, Tarlac na pinamayuhan niya dati siring man an mga residente na dakula an suporta saiya hasta sa ngunyan.
Mientras tanto, segun ki Bureau of Jail Management and Penology spokesperson Supt. Jayrex Bustinera, enkasong magdesisyon si Guo na magsunad nin kandidatura asin igwang court order, sisiertuhon ninda na magigin salbado an proseso.
Marurumduman na enot ng sinabi ni Comelec Chairman George Erwin Garcia na basado sa ley, posible pang magsunad nin COC si Guo.
