Nagpapadagos an preparasyon ni Alex Eala para sa paparaning French Open makalihis kumpirmaron na mapartisipar siya sa Internationaux de Strasbourg sa France puon Mayo 17 hasta 23.
Maagi man an 20-anyos na Pinay tennis star sa qualifying round ngani na makalaog sa main draw kan WTA 500-level tournament.
Si Eala an top seed sa qualifying round kan Strasbourg.
Igwang posibilidad na direkta siyang makalaog sa main draw enkasong igwang umatras na partisipante antes magpuon an torneo.
Kaibanan sa mga nasa main draw sinda Madison Keys, Leylah Fernandez, Emma Navarro asin Maria Sakkari.
Marurumduman na hali si Eala sa impresibong kampanya sa Italian Open kun sain uminabot siya sa ika-tulong round kan singles competition.
