Liwat na maghahampangan sinda Filipina tennis sensation Alex Eala asin Canadian star Leylah Fernandez sa Round of 16 kan Mubadala DC Open, nagkapirang bulan makalihis an saindang paghahampangan sa Stuttgart Open.
Nakuwa ni Eala an ticket sa masunod na torneyo makalihis an impresibong come-from-behind victory kontra ki dating world No. 4 asin 2024 Paris Olympic gold medalist na si Zheng Qinwen kan China.
Mientras tanto, madaling nalusutan ni Fernandez an Polish player na si Magda Linette sa opening round kan WTA 500 tournament.
Huring naghampang sinda Eala asin Fernandez kan Abril sa Stuttgart Open, kun sain nanggana an Canadian star.
Presenteng ika-34 sa world rankings si Fernandez.
Igwa siyang limang WTA singles titles asin naabot an world No. 13 kan Agosto 2022.
Kaibanan man sa pinakadakulang trayumpo ni Fernandez an pagtungtong kaini sa finals kan 2021 US Open asin quarterfinals kan 2022 French Open.
