LEGAZPI CITY- Pinag-aadalan pa sa ngunyan kan Commission on Elections (COMELEC) an mga gigibohong lakdang para sa 2020 elections nganing masiertong masusunod man giraray an mga health protocols asin maibitaran an paglakop kan coronavirus disease.
Sa intrevista kan Bombo Radyo Legazpi kay COMELEC Bicol Director Atty. Ma. Juana Valeza, sa ngunyan kaiba sa mga nahihiling na opsyon kan komisyon an pagpapalawig kan aldaw kan pirilian ngani na malimitaran an numero kan mga botante.
Sa nasabing plano, tatawanan nin schecule an mga botante kung anong aldaw sana mapasiring sa mga voting precinct ngani na magboto.
Lilimitaran man an pagpasiring kan ibang persona kung sain bawal na muna an mga nakikusyoso sana, dapat na may facemask asin face shield, social distancing asin iba pa.
Apwera digdi, pinag-aadalan man kan COMELEC kung pwedesir man na magsagibo nin online election sa nasyun alagad nangangaipo pa ini nin bill na dapat na maipasar kan Kongreso.
Katakod kaini nangapudan an komisyon sa Kamara asin Senado na hidalion na an pagpasar nin bill lalo pang sa masunod na taon na an eleksyon.
