LEGAZPI CITY — Preparado nang magsabak sa Binibining Pilipinas 2019 an sarong Albayana beauty kasabay kan kamawotang masungkit an korona sa pageant.
Sa eksklusibong intrevista kan Bombo Radyo Legazpi ki Francia Papa Layderos, tubong Libon, Albay asin saro sa 40 na opisyal na kandidata sa pageant, saro sa mga pigkokunsiderar na inspirasyon si Miss Universe 2018 Catriona Magnayon Gray na dugong Albayano man.
Magkahalong excitement asin nerbiyos suboot an namamatean urog na ini an pinakaenot na national pageant na papartisiparan.
Dugang pang gabos na mga kandidata an nagdedesider man makapag-uli nin korona.
Katakod kaini, nangapudan nin pangadyi asin suporta si Layderos sa mga kapwa Bicolano para sa kompetisyon.
Binibining Pilipinas 2019 Candidate Francia Papa Layderos from Libon, Albay
Tutok naman suboot ini sa training sa tabang kan mga mentor sa pag-otob kan haloy nang pangaturugan na magin representante kan nacion sa international pageant.
Anuman suboot an magin resulta kan kompetisyon, maogma si Layderos urog pa na sarong dakulang honra na an makalaog pa sana sa screening kaini.
Si Layderos an suki na man kan mga beauty pageants sa rehiyon na nagpuon sa school based pageant sa Bicol University antes magsabak sa Mutya ng Magayon, Mutya ng Ibalong, Miss Bicolandia, asin dakol na iba pa.
Afuera ki Layderos, nagkapira pang Bicolana an naglalaom man kan korona na sinda Sigrid Grace Flores kan Panganiban, Catanduanes, Julia Saubier kan Daraga, Albay asin Maria Isabela Galeria kan Matnog, Sorsogon.
