LEGAZPI CITY- Dakulang danyos sa sektor kan agrikultura an nairehistro sa provincia kan Albay huli sa epekto kan bagyong Enteng.
Segun ki Albay Provincial Agricultural Office Assistant Rice Program Focal Person Che Adivino sa intrevista kan Bombo Radyo Legazpi na nasa 1, 122 na mga rice farmers an naapektaran kun sain nasa 1, 073 hektarya nin tanuman nin bagas an partially damaged mantang 223 hektarya nin rice field an totally damaged.
Katumbas ini nin labi P41.2 million na danyos sa rice commodity.
Sa mais man nasa 73 na paraoma an apektado kan nasabing raot nin panahon asin nasa limang hektrya an totally damages asin 232 hektarya an partially damaged na nagresulta sa labi sa P2.1 million losses.
Para man sa mga high value crops nasa 103.91 hektarya an partially damaged mantang 63.46 hektarya an totally damaged na nagresulta sa labi sa P19.7 million losses asin naka apektar sa 121 na mga paraoma.
Alagad segun ki Adivino, pinaglalaoman na madudugangan pa an nasabing datos huli ta igwa pang mga banwaan an dae pa nakakapagsumiter nin report.
Mientras tanto, pighahanda na man kan ahensya an pananaho nin mga vegetable seeds, palay seed asin corn seeds sa mga apektadong paraoma.
Nangapudan man an opisyal sa mga local farmers na dae mawaran nin paglaom huli ta tatabangan suboot an mga ini na makabangon hali sa epekto kan nasabing raot nin panahon.
