LEGAZPI CITY – Maabot na sa 3, 000 o 2,621 an kaso kan mga nagkakahelang nin dengue sa provincia kan Albay.
Katakod kaini, ipigrekomenda kan Albay Provincial Health Office an pagsairarom kan bilog na provincia sa state of calamity.
Sa ekslusibong intrevista kan Bombo Radyo Legazpi ki Acting PHO head Dr. Antonio Ludovice, posibleng sumakat pa an nasabing kaso mantang dagos-dagos man an ipigsasagibong validation sa mga ospital.
Kaibanan sa may haralangkaw na kaso kan dengue an mga banwaan kan Daraga (387), Tiwi (330), Pioduran (322), Guinobatan (298) asin Legazpi City (245) mantang 10 na man an nagadan huli digdi.
Nagmeeting naman an PHO asin Albay Public Safety and Emergency Management Office (APSEMO) para sa rekomendasyon urog na ipigdeklara na an national dengue epidemic.
Segun ki Ludovice, dae na hahalatong padagos pang maglangkaw an kaso kaya gagamiton an quick response fund (QRF) sa pagbakal kan mga logistics na kokontra sa paglakop kan dengue virus.
Kasuodma pa suboot ipinadara an endorsement letter sa oficina ni Governor Al Francis Bichara mantang piglalaomang didiskutiron na sa session anumang aldaw.
