LEGAZPI CITY—Prayoridad ngunyan ni Albay Governor-elect Noel Rosal an pagpaparhay sa problema kan kuryente, health care, illegal quarrying magin an pag-maximize kan turismo sa Albay.
Segun ki Albay Governor-elect Noel Rosal, sa intrevista kan Bombo Radyo Legazpi, na willing siyang mag-alokar nin pondo sa Albay Electric Cooperative (ALECO) nganing magkaigwa nin toltol na serbisyo nin kuryente huli ta nagtutubod siya na saro ini sa mga pinakaimportanteng pangangaipo kan namamanwaan sa Albay.
Afuera digdi, prayoridad niya man an health care sa probinsya.
Siring man an pagpokus sa isyu kan illegal quarrying asin pag-maximize kan turismo sa Albay.
Dugang pa kan opisyal, na namamanwaan mismo an nagdesisyon na siya an pilion kun kaya nagmamawot siya na masabutan asin respetuhon ini kan gabos magin kan saiyang mga kalaban sa politika.
Mientrastanto, magigiromdoman na pormal nang naiproklamar kan Martes, Mayo 13, 2025, si Rosal bilang gobernador kan provincia kan Albay.
