LEGAZPI CITY- Ipinaliwanag ni Budget and Appropriations Chairperson Board Member Melissa Abadeza an nagkapira sa mga rason kaya dae pa naaaprubaran an 2026 budget kan provincia.
Sa intrevista kan Bombo Radyo Legazpi sa opisyal, sinabi kaini na dae naisumiter sainda an pighahagad kan Sangguniang Panlalawigan na mga quarry reports, na ganansya na konektado sa pagriparo kan pondo para sa 2026.
Siring man nanotaran na an beggining balance an zero an nakalaag kaya hinagad ninda na isumiter ini ngani na maaraman an financial status kan provincia sa pagpupuon kan 2026.
Paliwanag kan opisyal na Nobyembre pa kan nakalihis na taon na aram na kan mga responsableng opisina an pighahagad na mga dokumento kan Sanggunian.
Nanindugan si Abadeza na importante an nasabing mga dokumento ngani na maaraman kun nagtutugma an income kan provincia sa mga mawot kaining gastusan na mga programa asin proyekto ngunyan na taon.
Responsibilidad suboot kan Sangguniang Panlalawigan na mamanehar kun pira an kwarta kan Albay asin kun bastante ini sa mga pinagkakagastusan.
Mientras tanto, napag-araman na nakapagsumiter na nin computation sa quarry reports asin an beggining balance na sana an pinaghahalat sa ngunyan.
Tinawan duon pa kan opisyal na dae pigho-hold kan Sangguniang Panlalawigan an pondo huli ta mawot na ninda ining maipasar sa urog na madaling panahon ngani na makapagtaong atensyon man sa iba pang mga trabaho.
PHOTO: SP Albay
