LEGAZPI CITY-Temporamenteng sinarado kan United Arab Emirates (UAE) an saindang airspace poon ngonian na aldaw nin Martes, Marso 17, mantang pig-uulangan kan saindang militar an nagkapirang nagdadangadang na mga pagatake nin missile asin drone hale sa Iran.
Susog sa General Civil Aviation Authority kan UAE, na saro ining “pambihirang lakdang sa pag-iingat” para sa kaligtasan kan mga pasahero asin mga piloto, asin ngani maprotehiran an teritoryo kan nacion.
Isinagibo an desisyon kasunod kan drone attack kan Iran kan Lunes na nagpasiklab nin sarong fuel tank sa Dubai International Airport, na pigkokonsiderar na saro sa pinaka-importanteng aeropuerto sa kinaban.
Kasabay nagpapadagos na gera sa Middle East pinakusog kan Israel an pambobomba sa mga militanteng suportado kan Iran sa Lebanon na kun sain nagbalos an Iran sa paagi nin mga pag’atake nin drone asin missile na nakaapektar sa nagkapirang nacion sa Gulf region.
Afuera digdi, naglangkaw man an pagkahadit sa global energy crisis, huli sa pagulang kan Iran sa Strait of Hormuz—na sarong pinakaimportanteng ruta nin 1/5 kan krudo sa kinaban.
Naenot na man na pighahagad ni US President Donald Trump sa mga lider kan Europa na magpadara nin mga barkong panggera ngani magtenir na bukas an Strait of Hormuz alagad nag-negar digdi an Europa.
Poon kan magatake an U.S. asin Israel sa Iran, regular na nagpapalupad nin drones asin missiles an Tehran laban sa Israel, mga military base kan Amerika, asin mga energy infrastructure sa Gulf region.
Nai-report man kan militar kan Israel an panibagong missile salvo kan Iran harani sa Sea of Galilee, alagad warang nairehistrong irido sa pag-atake.
