Popoonan na sa Disyembre kan Commission on Elections an public bidding para sa mga bagong makinang gagamiton sa 2028 National asin Local Elections.
Segun ki George Erwin Garcia, COMELEC Chairman, target nindang ma-award an kontrata sa mapipiling supplier sa huring parte kan Enero o enot na parte kan Pebrero sa masunod na taon tangani magkaigwa nin bastanteng panahon sa procurement, pagpreparar asin pagsubok sa bagong election system.
Kasunod ini kan pag-apruba kan COMELEC En Banc sa binagong Terms of Reference para sa Full Automation System with Transparency Audit/Count o FASTRAC v2.0, na igwang pigkakarkulong kantidad na Php 22B.
Kabale sa mga pagbabago sa bagong sistema an posibilidad na paggamit nin stamp imbes na ballpen sa pagmarka kan balota tangani mapadali an pagboto asin maibitaran an problema sa pagkalat o pagdikit nin tinta.
Nilinaw man ni Garcia na pwedesir pang sumali sa public bidding an Miru Systems, na nagsuplay nin mga vote-counting machine kan nakaaging halalan, sa kondisyon na matugunan kaini an mga requirement sa bagong TOR.
Alagad, ipigdoon kan poll body na gabos na makinang gagamitin sa 2028 elections dapat bago asin bako na second-hand o mga kagamitang nagamit na sa nakaaging halalan.











