Kinumpirmar ni Atty. Salvador Paolo Panelo Jr., tagapagtaram ni Vice President Sara Duterte, na ligtas nang nabawi an duwang dating household staff members kan Bise Presidente sa tabang kan saiyang legal team asin kan pulisya kasuodma, Nobyembre 17, 2026.
Segun sa salaysay kan duwang dating tauhan na ipinaluwas ni Panelo ngunyan na Miyerkules, Nobyembre 18, ni-recruit suboot sinda nin sarong pribadong indibidwal kan Oktubre 2026 tangani magtrabaho sa sarong resort sa Boracay alagad dinara sa Maynila sa rason na masairarom sinda sa pagsasanay.
Pag-abot kan Nobyembre 16, sinabihan suboot sinda kan saindang employer na igwang huma sa saindang buhay asin magin sa buhay kaini huli sa pagkupkop sa sainda, kasabay kan giit na mawawara sana an huma kun mapirma sinda sa mga ipigpreparar na affidavit na igwa suboot nin mga salang paratang kontra kay Duterte.
Pigsayumahan suboot kan duwa na pirmahan an mga naunambitang dokumento, asin alagad nilinaw na dai sinda ikinulong, nagdanay sinda sa kustodiya kan employer huli sa takot sagkod na humagad na sinda nin tabang sa Bise Presidente.
Tulos man na sinundo kan legal team asin mga pulis an duwa kasuodma asin dinara sa himpilan kan pulisya tangani maggibo nin sinumpaang salaysay asin magpa-police blotter.
Segun sa kampo kan Bise Presidente, napugulan an suboot plano na gamiton an duwa para sa peke na testimonya, mantang nagtanggi muna sindang magtao nin dugang na detalye tangani masiguro an kaligtasan kan mga imbwelto.











