Pinagpapaliwanag kan Department of Energy (DOE) an labi sa 100 na gasolinahan huli sa dae pagsunod sa ipigpapaotob na bawas presyo.
Segun ki Oil Industry Management Bureau (OIMB) director Rino Abad na igwang 213 na gasolinahan an saindang nalibot puon Nobyembre 10 hanggang 13.
Nagluwas sa saindang imbestigasyon na igwang 114 na mga gasolinahan an nagpalyar na magpaotob nin presyo.
Dagdag pa kan opisyal na tinanwan ninda an nasabing mga gasolinahan nin 72 oras na magpaliwanag alagad bako katanggap-tanggap an eksplenasyon kan mga ini.
Basado kaya sa nagkapirang rason kan mga gasolinahan na nagkapirang semana na nindang nabakal an langis antes magpaotob nin bawas presyo.
Ipinasa na man ninda sa saindang Legal Department an nasabing inspection reports.
Enkasong mapatunayan na nagbayolar an mga ini, mahahampang an tagsadiri kan gasolinahan sa pagkakakulong nin tulong bulan hasta sarong taon asin multa na puon P50,000 hanggang P300,000.
Posible man na magpaotob an DOE nin administrative sanctions kaibanan an monetary penalties o pagsuspendi sa lisensya kan nasabing establishimento.










