LEGAZPI CITY-Tahasang sinabi kan sarong labor group na saro sa mga obheto ni US President Donald Trump sa saiyang pagbisita sa Pilipinas, iyo an pagpirma sa planong Pax Silica Initiative na itutugdok suboot sa New Clark City sa Capas, Tarlac.
Nagpahayag nin nagkapirang rason an grupo kun nata tutol sinda sa nasabing inisyatiba, magin sa pagbisita ni Trump para sa ASEAN Summit and Related Summits sa nacion.
Segun kay Kilusang Mayo Uno Chairperson Jerome Adonis, sa intrevista kan Bombo Radyo Legazpi na saro ining military zone, imbes na economic zone.
Haros sapin-sapin na problema suboot an resulta kaini, kun sain gigibohong “military zone” an satuyang nacion.
Magibo suboot digdi nin mga “chips” bako para sa teknolohiya, kundi para sa mga sangkap sa pankinabang armas kan Estados Unidos.
Sinabi pa niya na an nabanggit na bako ini industrialization asin bako ini simbag sa mga problema kan satuyang nacion.
Proyekto sana suboot ini kan Estados Unidos, komo “rivalry” sa pag’ultanan kan China.
Kun sain sa irarom kaini, isasagibo an proyekto sa Luzon asin pangengenotan mismo kan Estados Unidos ngani magin ganansya para sa saindang ekonomiya.
Dagdag pa ni Adonis, wawasakon sana kaini an mga kabuludan, mga kritikal na mineral, enerhiya, asin kapalibutan, maski na pignenegaran pa kan gobierno.
Pakikinabangan sana suboot kan mga dayuhan an proyekto asin dae man suboot ini magibo nin rinibong trabaho, arog kan pahayag kan nagkapira.
Sa katunayan, bako man suboot purong mga Pilipino an magigin empleyo sa mga data centers kaini, huli sa kakulangan nin mga espesyalisasyon.
Sinabi pa niya na apektado kan proyekto an mga katutubo, mga paraooma, obrero, asin farmland, na magigin rason kan kakulangan sa pagkaon asin problema sa importasyon.
