LEGAZPI CITY-Na-obserbaran kan Philippine Institute of Volcanology and Seismology (Phivolcs) an panibagong lava dome sa summit crater kan Bulkang Mayon asin sinabing posibleng indikasyon ini kan panibagong pagtuga.
Segun kay Phivolcs Chief of the Volcanology Division Mariton Bornas, sa intrevista kan Bombo Radyo Legazpi na kun marurumduman kan taong 2018, karaniwan na “on set” ini kan pagkakaigwa nin sarong eruption.
Kadakol kayang pagtuga an pinangenotan na kan pagsulpot kan sarong lava dome sa crater kan Bulkan.
Nanotaran an nasabing bagong lava dome sa summit crater kan Mayon ngonian na aldaw nin Biyernes, sa paagi kan close-up camera monitor.
Paliwanag kan opisyal na posibleng magkaigwa nin panibagong “cycle of eruption” .
Posible suboot ini huli ta gabos na senyales na pigpapahiling kan bulkan, siring kan paglangkaw kan volcanic gas, ground deformation, asin saradit na volcanic earthquake swarms, mantang nagtetenir ini sa Alert Level 3.
Pagirumdom kan opisyal na dae man dapat ikatakot an pagsulpot kan lava dome sa Bulkang Mayon, alagad dapat man giraray na magin alerto.
An lava dome, an nabibilog huli sa maluway na pagsakat kan lava o magma mantang nagu-usad paitaas sa crater kan bulkan, asin nawawaran nin volcanic gas.
Kapag an lava nagkakaigwa nin degassing asin nagtatagas, ini an nagbibilog sa crater nin sarong “dome” o sarong round shape.
Mientras tanto, padagos pa an monitoring kan Phivolcs sa bagong pinapahiling na aktibidad kan Bulkang Mayon.
