LEGAZPI CITY-Nagpaluwas na nin extradition arrest warrants asin hold departure orders (HDO) an Makati City Regional Trial Court (RTC) Branch 145, laban ki Pastor Apollo Quiboloy, Teresita Dandan, asin Helen Panilag.
Kasunod ini kan mga seryosong akusasyon gikan sa Estados Unidos, na kabali an “conspiracy to engage in sex trafficking by force, fraud, and coercion, sex trafficking of children”, “conspiracy to commit sex trafficking”, asin” bulk cash smuggling”.
An mga akusasyon na ini gikan sa ipinaluwas kan Nobyembre 2021 kan US District Court for the Central District of California, na nagbusol sa Federal Bureau of Investigation (FBI) na magpaluwas nin “wanted” poster para kay Quiboloy kan Enero 2022.
Sa ibong kan mga kaso na ini, si Quiboloy padagos na pignenegaran an mga alegasyon asin pig-aasegurar na dai suboot siya mapasakop sa hurisdiksyon kan Estados Unidos.
Nagsambit man siya nin mga kahaditan manungod sa saiyang kaligtasan asin sa saiyang derichos, sa tamang proseso, na nagsasabi na siya sarong biktima nin politikal na persecution.
Apwera sa kaso nin extradition, si Quiboloy napapaatubang man sa separadong mga kaso sa Pilipinas—kabali an qualified human trafficking asin child abuse—na isinangat kan Department of Justice (DOJ) kan Marso 2024, na nagin rason kan pagpaluwas nin mga mandamiento de aresto kan mga korte sa Davao asin Pasig City.
An korte sa Makati nagdeterminar na igwa nin posibleng dahelan na magtubod na an tolong indibidwal, iyo man sana an mga tawong nginaranan sa mga mandamiento de aresto asin mga kasong ini sa Estados Unidos, asin na an mga suboot pagkakasala kabali sa sakop kan extradition.
Kinumpirmar kan Department of Justice (DOJ) an pagluwas kan mga warrant asin sarong Hold Departure Order (HDO), kasunod kan pormal na petisyon na isinangat kan Estados Unidos kan Nobyembre 9, 2023, na naghahagad kan extradition kan tolong indibidwal.
An pagluwas nin sarong extradition warrant asin sarong Hold Departure Order, minamarka nin sarong importanteng lakdang sa proseso nin extradition, na nagpapahiling na an korte, igwang supisyenteng mga basehan nganing ipadagos an mga pagdangog sa extradition.
