LEGAZPI CITY-Nakatalaan na magdistribwir an Department of Social Welfare and Development (DSWD) nin P10,000 na financial aid asin family food packs sa mga apektadong food stalls asin paratienda huli sa ASEAN Summit sa masunod na semana.
Magigirumduman na temporaryong isinarado an nagkapirang food stalls sa Pasay asin Parañaque bilang parte kan mga lakdang sa seguridad mantang nagpapadagos an ASEAN summit.
Segun sa pahayag na ipinaluwas ni Social Welfare Secretary Rex Gatachalian, inasegurar ninda na makakapagtao tulos na tabang sa mga apektadong food stall owners sa Pasay City asin Parañaque City.
Dugang pa kaini, naghahagad sinda nin dispensa sa mga Pinoy na apektado kan temporaryong pagsasarado.
Tinawan duon man niya na maski dakula an papel kan ASEAN summit sa Pilipinas, importante man giraray na tawan nin atensyon asin prayoridad an kabuhayan kan lambang Pilipino.
Mientrastanto, segun sa departamento, nagpoon na sindang magtao nin payout sa mga food stall owners kan nakaaging Domingo.
Sinabi man ni Gatchalian na piglalaoman ninda na matatapos an distribusyon kan tabang pinansyal ngonian na Biyernes, asin kaipuhan na maitao ini para sa mga paratienda asin pamilya ninda bago magpoon an summit.
Sa ngonian, nasa 30 establisimiento an nakaresibe nin P10,000, mantang maabot sa 1,300 na mga paratienda an makakaresibe nin tabang pinansyal saaga, Biyernes.
