LEGAZPI CITY-Magpapaluwas pa nin mga testigo an defense team ni Vice President Sara Duterte ngani simbagon an mga kahaputan na dae natugunan sa mga naenot na testimonya, partikular sa mga orolay kan Statement of Assets, Liabilities and Net Worth (SALN).
Segun kay defense spokesperson Atty. Michael Poa, kaiba sa mga mawot nindang linawon an pagkakaiba kan mga impormasyong nakalaag sa SALN ni Duterte asin mga dokumentong nasa Securities and Exchange Commission (SEC).
Kasunod ini kan paghahapot ni Senate President at presiding officer Francis Escudero kay defense witness Atty. Suzette Balucanag-Punay mapadapit sa suboot investment ni Duterte sa sarong fast-food branch.
Inako man ni Balucanag-Punay na dae niya aram kun nata nakakaresibe nin bayad an bise presidente hale sa nasambitang negosyo.
Ipinaliwanag ni Poa na may limitasyon an kaaraman kan kada testigo kaya igwa pa sindang ihahampang ngani magtao nin dugang na mga impormasyon.
Mientras tanto, dae na suboot ihahampang an kadaklan sa mga bank representative bilang testigo, afuera sa kinatawan kan saro pang bangko.
Dae pa man piglalantad kan depensa an pagkakakilanlan kan ibang mga testigo na saindang ihahampang sa senate impeachment court.
