Sinierto kan National Food Authority (NFA) na na bastante an emergency rice allocation kan ahensya sa tahaw kan matinding El Niño asin pinaglalaoman na pagdedeklarar nin state of calamity kan nagkapirang lokal na gobierno sa nacion.
Segun sa opisyal na datos kan National Disaster Risk Reduction and Management Council (NDRRMC), labi sa 100 na lokalidad na an nasa irarom kan state of calamity huli sa matinding tagmara, kun sain pinakadakol digdi an nairehistro sa Cagayan Valley na igwang 66 na lugar asin sa rehiyon kan Caraga na igwang 23 na lugar.
Sinabi ni NFA Administrator Larry Lacson na bastante an presenteng buffer stock kan ahensya na madurar nin walong aldaw para sa bilog na populasyon kan Pilipinas, kasabay kan padagos na operasyon sa pagbakal nin paroy.
Basado sa opisyal na datos kan ahensya, nasa poco mas o menos 292,000 metric tons o katumbas nin limang milyon na sado nin bagas an presenteng nakatambak sa manlain lain na bodega sa nacion.
Sa ibong kaini, binisto man ni Lacson an naga iral na angat sa produksyon makalihis ihayag kan Philippine Statistics Authority (PSA) an pagbaba kan ani, partikular an 650,000 metric tons na decline kan ika-tulong quarter asin pinaglalaoman na pagbaba man sa ika-apat na quarter.
Segun sa mga projection, posibleng umabot sa 1 milyong metric tons an kabilugan na bawas sa lokal na ani, kaya man amay na nagpaotob an NFA nin mga lakdang para sa epektibong pagbabarewas nin suplay.
Ini man an rason kaya mas hibaba an nakuwang volume kan procurement kan ahensya sa mga nakalihis na bulan, huli sa limitadong suplay asin epekto kan nakalihis na panajon sa mga paraoma.
