Liwat na ipinagpadagos an paglilitis sa impeachment trial ni Vice President Sara Duterte ngunyan na Martes, Nobyembre 10, 2026, sa ika-41 aldaw kan proseso sa Senado makalihis na pormal na ideklara an quorum sa pag-atendir kan 13 senator-judges.
Isinalang kan defense team an saindang ika-duwang testigo na si Island Garden City of Samal Assessor Engr. John Kenneth Enumerables ngani na magtao kan saiyang testimonya dapit sa ari-ariang pigkokonektar sa bise presidente asin sa saiyang agom na si Atty. Manases Carpio.
Obheto kan presentasyon kan depensa na pahimutikan an akusasyon kan prosekusyon na dae suboot ipigdeklara o sala an naging deklarasyon ni VP Duterte sa saiyang Statement of Assets, Liabilities, and Net Worth (SALN) katakod kan nasabing ari-arian sa Samal, Davao del Norte.
An pagsalang ni Enumerables an kasunod kan paghampang kasuudma kan enot na testigo kan depensa na si Davao City Assessor Engr. Jaime G. Adalin, na tinuyaw kan mga senador huli sa dae kaini pagtatao nin malinaw na kasimbagan sa nagkapirang kahaputan sa paglilitis.
Huli digdi, sa pagpupuon kan trial, hinapot ni Senator-Judge Vicente Sotto III si Presiding Officer Francis “Chiz” Escudero dapit sa padusa sa mga indibidwal na mag-uutik sa hampang kan impeachment court.
Nilinaw man ni Escudero na pwedesir na patawan nin contempt kan hukuman an siisay man na mautik, afuera pa sa posibleng paghampang sa kasong perjury kun maisunad ini sa regular na hukuman.
