Naghampang bilang enot na testigo kan depensa si Davao City Assessor Engr. Jaime G. Adalin sa pagpapadagos kan impeachment trial ni Vice President Sara Duterte ngunyan na Lunes, Nobyembre 9, 2026.
Ipigpresentar ni defense counsel Atty. Lindon Miguel Bacquel si Adalin ngani na patunayan na an ari-ariang sakop kan sarong Transfer Certificate of Title (TCT) an matanos na idineklara kan bise presidente sa saiyang Statement of Assets, Liabilities, and Net Worth (SALN).
Sa ibong kaini, kinuwestiyon ni prosecution counsel Atty. Benjamin Tolosa Jr. an obheto kan depensa asin pigduon na dae kayang patunayan kan testigo na an ari-arian sa SALN an kapareho kan nasa TCT huli sa nahihiling na “glaring discrepancy” partikular sa acquisition value kaini, afuera sa pagkontra sa nagkapirang offer of testimony na suboot “improper” asin “misleading.”
Sa tahaw kan paglilitis, hinagad ni Atty. Bacquel an panandaliang suspensyon kan trial ngani na masuri an mga dugang na dokumento na dara kan testigo.
“With due respect, your honor, if we can also be given a few minutes to examine and peruse the documents?” apela ni Bacquel kay Presiding Officer Francis “Chiz” Escudero.
Ini makalihis aramon kun igwang kopya an depensa, kun sain sinimbag man ini kan abogado na “We have copies of the tax declaration, your honor, but to ensure and to examine the other documents that have been brought by the witness, which we may not have any copy, your honor,” na tulos man na pinagbigyan kan hukuman sa paagi kan tulong minutong recess.
Antes an halipot na interruption, kinumpirma man ni Adalin sa paagi kan saiyang dara na Administrative District Index Map na an Barangay Matina Crossing asin Barangay 74-A an sarong lugar sana sa Davao City makalihis ideklarar ni Escudero na nagtugot man an prosekusyon na mag-stipulate sa nasabing orolay.
