LEGAZPI CITY-Na-elihir bilang attorney general kan Texas si Nathan Johnson, sarong Democrat asin dating composer kan musical scores kan sikat na anime series na Dragon Ball Z, makalihis magwagi sa katatapos na US midterm elections.
Nakua ni Johnson an mayorya kan mga boto sa haros gabos na southern border districts asin pangenot na ciudad sa Texas, laban sa katunggali niyang Republican na si Mayes Middleton.
Segun ki Johnson, siya an nagbilog kan musical scores para sa 67 episodes asin limang pelikula kan Dragon Ball Z.
Naging voice actor man siya sa English dubbing kan anime film na Berserk.
Basado sa online database, kaiba sa mga production credit ni Johnson an musika para sa nagkapirang episode asin pelikula kan Dragon Ball Z poon kan 1990’s hasta 2008.
Afuera sa pagiging composer, saro man siyang litigator na igwang degree sa Physics asin Law.
Mientras tanto, papalitan ni Johnson sa puwesto si outgoing Attorney General Ken Paxton na dae na liwat nagkandidato sa nasabing posisyon.
