LEGAZPI CITY – Pinaigting kan Police Regional Office 5 an operasyon kontra kriminalidad sa paagi nin padagos na pag-apply nin search warrants asin warrant day operations.
Segun ki Police Brigadier General Randy Silvio, Regional Director kan Philippine National Police (PNP) Bicol, naka-82 nang search warrants an na-apply kan rehiyon para sa mga imbuelto sa ilegal na aktibidad.
Huli kaini, naglangkaw an accomplishment kan Setyembre nin 45 percent asin mas lalo pang naglangkaw ngonian na Oktubre.
Obheto kan warrant day operation na papag-istaron sa kulungan an gabos na may warrant of arrest tanganing matawan nin hustisya an mga biktima.
Mientrastanto, nangapodan man an opisyal sa mga gun owners na maging responsable asin i-renew an saindang License to Own and Possess Firearms (LTAP), o isuko kun expired na an lisensya.
Nagapagirumdom man an PNP na tulos mag-apod sa 911 kun may emergency imbes na i-post muna sa social media tanganing mas marikas na makaresponde an kapulisan asin ma-seal an lugar kun kaipuhan.
