LEGAZPI CITY- Kinondena kan Bicol University – Animal Welfare Society an ginibong pagtatapok sa mga nagadan na hayop, imbes na i-cremate, sa parte kan Bulacan.
Segun ki Bicol University – Animal Welfare Society Chairperson Jasmine Claire Colarina sa intrevista kan Bombo Radyo Legazpi na nakakadagit asin nakakamundo an ginibong pagtatapok sa lawas kan nasa 29 na mga hayop.
Paliwanag kan opisyal na padagos an saindang pangapudan nin accountability ngani na maimbestigaran an establishimento na imbwelto sa insidente asin iba pang pet crematorium.
Ipigduon man kaini an epekto kan nasabing insidente sa mga fur parents na nagkakatiwala kan saindang mga ayam sa mga pet crematorium.
Afuera digdi, sinabi ni Colarina na nagdadara man nin peligro sa kapaliburan an bastang pagtatapok kan gadan na mga hayop urog pa kun nalalapa na an mga ini.
