LEGAZPI CITY—Padagos an pangapudan kan grupong BAN Toxics sa publiko mapadapit sa pagigin toxic-free asin malinig na kapalibutan durante kan obserbasyon ngunyan kan Undas.
Segun ki BAN Toxics Campaigner Tony Dizon, sa intrevista kan Bombo Radyo Legazpi, kabale sa saindang pangapudan siring na sana kan paglinig sa mga nitso an mas maray nang maggamit nin mga pintura na may tatak na “Lead-Safe Paint.” asin dae na ipagwalat sa kamposanto an mga pinaggamitan kan paglinig sa mga nitso.
Dugang niya na mas mainam man na magdara nin bugtakan nin mga pagkakan sa kamposanto, washable utensils, nganing mamantinir an kalinigan.
Sa pagbakal man nin burak pwedesir man suboot na abisuhan an mga paratienda na halion o dae na pagbugtakan nin anumang plastic packaging huli sa ini an komon na nahihiling na klase nin basura kada pag-abot nin Undas.
Pigsaysay man ni Dizon na komon sa saindang nanunutarang klase nin basura kada obserbasyon kaini an mga food-packaging.
Sa presente, padagos an saindang monitoring asin nakikipagkoordinar sa mga administrator kan mga kamposanto kun igwa nin mga patakaran mapadapit sa kalinigan.
Afuera sa Undas, sainda man na pigbabantayan an mga Halloween party kun sain pwedesir man na nagggamit nin mga toxic materials na posibleng ma-expose an mga kajovenesan.
