Inihayag kan Department of Energy (DOE) na tatawan-prayoridad kaini an rehiyon kan Visayas sa pagpapatatag kan lokal na suplay nin kuryente nganing malikayan an labing paghingoa sa power import hale sa Luzon asin Mindanao.
Segun ki Electric Power Industry Management Bureau (EPIMB) Director Mario C. Marasigan, dakulang lakdang ini nganing dae na maghingoa sa power exchange ang mga rehiyon, urog na ngunyan na komon na makaeskperyensya nin yellow alert ang Visayas huli kan kakulangan sa reserba sa kada nagkakaigwa nin sabay-sabay na aberya asin maintenance sa mga planta.
Ipinunto man kan opisyal na dakula an magigin epekto kan naeeksperyensyahang El Niño sa mga masunod na bulan, kun saen piglalaomang mababa nin hasta 60% ang kapasidad kan mga hydropower facility asin maaapektaran man an solar generation nin 20 hasta 25%.
Kasabay kaini, nahihiling man an padagos na paglangakw kan peak demand sa kuryente sa rehiyon na piglalaomang masakat hale sa dating 2,558 megawatts pasiring sa 3,000 megawatts, mantang naglalangkaw man an demand sa bilog na nacion.
Nganing masimbagan ini, pigpapaotob an mga marikas na solusyon, kabale an nakatalang paglaog kan 253 megawatts hale sa mga bagong battery energy storage systems (BESS) sa masunod na taon.
Afuera digdi, nakalinya man an pagtagama nin kadugangang power barges asin diesel facilities na aabot sa 273 megawatts nganing madugangan an reserba kan kuryente sa rehiyon.
Piglalaoman na sa paagi kan mga lakdang na ini an malilikayan na an pirmehang alert status sa Visayas asin maaasigurar an bastante asin padagos na serbisyo kan kuryente sa mga namamanwaan sa ibong kan mga angat sa panahon.
