Nairehistro kan Armed Forces of the Philippines (AFP) an 54 na behikulong pandagat kan China sa nagkapirang parte kan West Philippine Sea puon Oktubre 20 hasta 26, na mas halangkaw kumparar sa 31 na nairehistro kan nakalihis na semana.
Segun ki AFP spokesperson for the WPS Rear Admiral Roy Vincent Trinidad, kaibanan sa mga na-monitor an barko kan People’s Liberation Army Navy asin China Coast Guard.
Sa kabilugan, nasa 14 na barko an namonitor sa Ayungin Shoal, 17 sa Bajo de Masinloc, pito sa Escoda Shoal asin 16 sa Pag-asa Islands.
Padagos an tensyon sa WPS huli sa mahewas na pagklamar kan China sa kadagatan, na igwang magkakapatong na territorial asin maritime claims kan nagkapirang nacion, kaibanan an Pilipinas.
Kan 2016, nagdesisyon an arbitral tribunal sa irarom kan United Nations Convention on the Law of the Sea na warang legal na basehan sa nasabing convention sa pagklamar kan China sa historic rights sa laog kan nine-dash line.
Sa ibong kaini, dae pigbibisto kan Beijing an nasabing desisyon.
