LEGAZPI CITY-Nai-rekord kan Armed Forces of the Philippines (AFP) an 54 na sasakyang pandagat kan China sa nagkapirang parte kan West Philippine Sea poon Oktubre 20 sagkod 26, na mas halangkaw kumparar sa 31 na nairehistro kan nakalihis na semana.
Segun kay AFP spokesperson for the WPS Rear Admiral Roy Vincent Trinidad, kaiba sa mga namonitor an mga barko kan People’s Liberation Army Navy asin China Coast Guard.
Sa kabilugan, 14 na barko an namonitor sa Ayungin Shoal, 17 sa Bajo de Masinloc, pito sa Escoda Shoal asin 16 sa Pag-asa Islands.
Padagos an tensyon sa WPS huli sa mahiwasang pag-aangkin kan China sa kadagatan, na igwang magkakapatong na territorial asin maritime claims kan nagkapirang nacion, kaiba na an Pilipinas.
Kan 2016, nag desisyon an arbitral tribunal sa irarom kan United Nations Convention on the Law of the Sea na warang legal na batayan sa nasabing convention an pag-aangkin kan China sa historic rights sa laog kan nine-dash line.
Siring man, dae pigbibisto kan Beijing an nasambitang desisyon.
