Ibinandera sa Senado an suboot labi sa P1 trillion na kantidad kan mga alokasyon sa propuestong 2027 national budget asin tinukoy na ‘red flags’ kan People’s Budget Coalition.
Sa pagdangog kan Senate Finance Committee kaibanan an Civil Society Organizations, inihayag ni coalition co-convenor AJ Montesa na kaibanan digdi an P210 bilyon na soft pork, P695 bilyon na hard pork, asin P112 bilyon na shadow pork o unprogrammed appropriations.
Ipigkokonektar kan grupo an soft pork sa mga ayuda na suboot nakadepende sa patronage, mantang an hard pork an nagtutukoy sa mga proyektong imprastruktura na pwedesir na maimpluwensyahan kan mga politiko.
Segun ki Montesa, nagdadara nin pagkahadit an mga nasabing alokasyon huli ta posibleng mas mapaboran an interes kan mga politiko kaysa sa pangangaipo kan publiko.
Bilang kasimbagan, nagsuhestyon an People’s Budget Coalition nin mga reporma sa sistema kan ayuda ngani na mas direktang mapakinabangan kan mga namamanwaan an pondo kan gobierno.
Kaibanan digdi an paglilipat kan pondo hali sa Medical Assistance for Indigent and Financially Incapacitated Patients o MAIFIP pasiring sa PhilHealth, pondo na hali sa Tulong Dunong patungo sa Tertiary Education Subsidy, asin hali sa Assistance to Individuals in Crisis Situation o AICS pasiring sa Pantawid Pamilyang Pilipino Program o 4Ps.
Ipigsuhestyon man kan grupo na halion an guarantee asin referral letter system sa pagkuwa nin medical assistance asin ipauibaya na sana sa mga magkakanigong ahensya o hospital social services an pag-isyu kan mga kinakaipuhan na dokumento.
Hinagad man kaini an malinaw na processing timeline asin priority lanes para sa mga emergency na may kinaaraman sa pagpapabulong asin pagpapalubong.
Mientras tanto, kinuwestyon man kan grupo an haros 7,000 na mga proyekto na nagkakantidad nin P190 bilyon na warang kalakip na dokumentong posibleng mahiling kan publiko.
Segun ki People’s Budget Coalition co-convenor Kenneth Ibasco Abante, dae ninda ipig-aakusar an korapsyon sa gabos na mga proyekto huli ta pigbibisto man ninda an importansya sa nacion kan mga imprastraktura.
Sa ibong kaini, ipigduon niya na kinakaipuhan na igwang bastante asin malinaw na dokumentasyon an mga proyektong popondohan kan buwis kan mga namamanwaan.
Huli digdi, nangapudan si Abante sa Senado na halion sa propuestong pondo an mga proyekto na warang naisapublikar na kalakip na dokumento, asin inenganyar an presidente na dae pag-aprubaran an mga ini.
Inihayag man kan opisyal an pagkahadit na sa ibong kan mga protesta asin pangapudan para sa reporma sa budget, garing bako pa bastante an kasimbagan kan nagkapirang lehislador sa Kamara de Representantes.
Pinasalamatan man niya an mga senador sa pagdangog sa mga pangapudan kan mga budget advocate para sa sistematikong reporma sa proseso sa pagbilog kan national budget.
Mientras tanto, pinaglalaoman na magtitiripon an Bicameral Conference Committee sa ika-duwang semana kan Disyembre ngunyan na taon, ngani na pag-olayan kan duwang kapulungan an 2027 national budget na nagkakantidad nin P7.2 trilyong piso.
