LEGAZPI CITY– Bilog na an preparasyon kan Bureau of Fire Protection (BFP) Legazpi para sa piglalaoman na pagdagsa kan mga tawo sa mga sementeryo, terminal asin malls ngonian na Undas.
Segun ki SFO2 Norman Andes, sa intrevista kan Bombo Radyo Legazpi, sinaysay kaini na na-update na ninda an saindang OPLAN Kaluluwa deployment plan para sa Undas 2026.
Mapuon an saindang deployment poon Oktubre 28 hasta Nobyembre 2, kun saen ma-assign sinda nin mga personahes, fire truck asin ambulansya sa mga estratehikong lugar sa ciudad.
Kabale sa mga babantayan iyo an Legazpi Grand Central Terminal kun saen ilalaag an saindang Special Rescue Force, asin mga pangenot na kamposanto sa ciudad kun saen sinda mabugtak nin fire truck.
Apwera sa BFP, katabang man sa pagbantay an Philippine National Police (PNP) asin iba pang ahensya kan gobyerno tangarig na maseguro an seguridad kan publiko.
Nagpagirumdom man si Andes sa publiko na mag-ingat sa paggamit nin kandila asin iba pang bagay na pwedesir magin kawsa nin kasulo sa mga kamposanto.
