LEGAZPI CITY-Nag-anunsyo an Malacañang ngonian na aldaw nin Lunes, na igwang pagbabago sa posisyon kan duwang pangenot na departamento kan gobierno kun sain si Department of Transportation (DOTr) Acting Secretary Giovanni Lopez asin Department of Public Works and Highways (DPWH) Secretary Vince Dizon an magpapalitan nin posisyon.
Sa irarom kan nasabing balasahan, mabalik si Dizon nganing pamayohan an DOTr makalihis na magsirbe sa DPWH, mantang si Lopez, opisyal na masalida sa pamamayo kan nabanggit na ahensya.
Segun sa pahayag hale sa Palasyo, katuyuhan kan pagpapalitan, iyo an magin mas marikas asin mas epektibo suboot an implementasyon kan national infrastructure asin mass transportation projects kan administrasyong Marcos sa paagi kan subok na kakayanan asin eksperyesnya kan duwang kalihim.
Antes kaini, si Dizon nagsirbi man bilang Presidente asin CEO kan Bases Conversion and Development Authority (BCDA) asin iyo an Presidential Adviser for COVID-19 Response kan panahon kan administrasyong Duterte.
Si President Ferdinand Marcos Jr. enot na nagnombra ki Dizon bilang kalihim kan DOTr kan Pebrero 21, 2025, na nagsalida sa nagretirong si Jaime Bautista.
Si Dizon pinalipat sa DPWH bilang ad interim secretary kan Setyembre 1, 2025 antes siya ibalik sa DOTr kan Oktubre 26, 2026.
Sa ibong na lado, si Lopez, sarong abogado na nagsirbe sa manlaen-laen na halangkaw na posisyon sa DOTr, kabali an chief of staff asin undersecretary para sa administrasyon, finance, asin procurement.
Nagtukaw naman man si Lopez sa pwesto bilang Acting Secretary kan DOTr kan Setyembre 1, 2025 kan naglipat si Dizon sa DPWH.
