Binisto komo rank 2 sa “10 Outstanding Students of Albay” si Mark Joshua Cuashin, gikan sa Bicol University College of Arts and Letters, sa Albay Kadunong Awards.
Sa intrevista kan Bombo Radyo Legazpi, ipigpahayag niya na aktibo siya sa Communication Students Association poon kan saiyang enot hasta ikatulong taon sa kolehiyo, antes nagbalyo kan saiyang pokus sa akademiko kan saiyang ikaapat na taon.
Sinabi niya na Hulyo 23 na kan magdesisyon siyang ipadagos an aplikasyon, huli ta naaraman niya na an deadline pinalawig poon Hulyo 15 sagkod Hulyo 24.
Uminabot sa labing 100 na dokumento an saiyang pigpreparar, kabali an mga naratives asin mga sertipiko na nagpoon pa kan saiyang mga taon sa hayskul hasta kolehiyo.
An mga pamantayan sa pag-award iyo base sa Liderato, Serbisyo, Adbokasiya, asin Akademya, asin nag-agi sa tulong yugto nin proseso: pag-verify kan dokumento, pagpili kan Top 20, asin sarong huring interbyu.
Sarong semana makalihis an huring screening pig-anunsyar an Top 20, asin an saiyang pangaran kabali sa mga ini.
