LEGAZPI CITY—Arestado an apat na indibidwal asin nasakyada an sarong drug den sa kinundusir na buy-bust operation kan Domingo, Oktubre 25, sa Purok 6, Barangay 41 Bogtong, Legazpi City.
Binisto an mga naarestar na sinda alyas “Obet”, 43-anyos, may agom, construction worker, drug den maintainer; alyas “Toks”, 26-anyos, warang agom, laborer, drug den employee; alyas “Nad,” 37-anyos, warang agom, drug den employee; asin alyas “Nido”, warang agom, rubber bushing mechanic, drug den employee; an mga nasabing persona an pararehong residente kan naunambitang indibidwal.
Nakumpiskar digdi an nasa 15 gramos nin pigtutubudang shabu na may standard value price na P102,000 asin iba pang non-drug paraphernalia.
Ginibo an operasyon kan Philippine Drug Enforcement Agency Albay Provincial Office, PDEA SeaPort interdiction Unit, PDEA Regional Office 5 Regional Special Enforcement Team I, PDEA Regional Office 5 RSET, Legazpi City Police Station, Albay Provincial Intelligence Unit asin Coast Guard Intelligence Unit Albay.
Mientrastanto, mahahampang an mga suspek sa kasong pagbalgar sa Sections 5, 6, 7, 11, 12 and 15, Article II kan Republic Act 9165 o Comprehensive Dangerous Drugs Act of 2002.
