LEGAZPI CITY- Handa na an mga kapulisan sa Albay para sa ilalatag na seguridad sa bilog na provincia para sa nagdadangadang na Undas.
Segun ki Albay Police Provincial Office Public Information Officer PMaj. Kharren Formales sa intrevista kan Bombo Radyo Legazpi na nasa 777 na mga personahe an ilalatag sa manlain lain na mandato sa panahon kan Undas.
Igwang mga idedeploy sa mga sementeryo bilang pagtataong seguridad, siring man sa mga pantalan, asin erpuerto.
Tinawan duon kan opisyal an importansya kan presensya kan mga kapulisan ngani na maasegurar na matrangkilo asin salbado an obserbasyon kan Undas.
Sa ibong kaini, nangapudan nin kooperasyon asin tabang an mga kapulisan sa publiko ngani na mamantenir an paz y orden.
Mientras tanto, kaibanan pa sa mga tututukan kan kapulisan an posibleng pagsasamantala kan nagkapirang mga maraot na buot.
Paliwanag ni Formales na pigtatawan atensyon an posibleng insidente kan petty crimes siring kan theft asin robbery huli ta dakol an mga mahali sa saindang kaharungan asin samantalahon ini kan mga kawatan.
