Ipigpaliwanag ni Gov. Patrick Alain Azanza an proseso kan probinsya sa direktang pagbakal nin abaka sa mga paraoma sa Catanduanes.
Segun sa gobernador, igwa nin fiber inspector hali sa FIDA na iyo an magkaklasipikar kun anong klase kan abaka an dara kan paraoma.
Kaipuhan man na rehistrado an paraoma ta habo kan probinsya na sa trader magbakal, ta pwedesir bakalon sana kan trader sa barato an abaka asin sinda an magganansya.
Kaya iniimbitaran kan probinsya an mga farmers association o an mga ordinaryong mga paraoma.
Igwa man nin listahan kan mga rehistradong paraoma na abacalero na iyo an gigibuhon na basehan sa pag-verify.
Makalihis an classification, kikiluhon an abaka asin gigibuhan nin accounting system kun saen matao nin order of payment.
Segun kay Gov. Azanza, nasa 79 pesos an prevailing price kan FIDA kasuodma asin may suporta an probinsya na 30 pesos, kaya nasa 109 hasta 110 pesos an presyo kada kilo, mas halangkaw sa enot na palano na 100 pesos.
