Ikinahahadit kan manlain lain na agricultural sector an amay na danyos na dara kan El Niño sa nacion, kun sain uminabot na sa poco mas o menos P6.87 billion an danyos sa pagpupuon pa sana kan matinding tagmara.
Sa presente pigkakarkulong nasa 223,000 na mga paraoma asin labi sa poco mas o menos 240,000 ektarya nin dagang sakahan na an direktang naapektaran.
Pinakamatinding tinamaan an sektor kan mais, na igwang nairehistrong P4.9 billion na danyos, mantang nasa P1.5 billion man an nawara sa sektor kan paroy.
Segun ki MAGSASAKA Party-list Representative Argel Cabatbat, an krisis na ini an magdadara nin huma nin “domino effect” sa sa bilog na ekonomiya.
Oras na dagos na bumagsak an kabuhayan kan mga paraoma, maaapektaran man an suplay asin presyo kan mga karne nin urig, manok, baka, asin kambing huli sa kawaran nin pagkaon asin tubig para sa livestock.
Huli digdi, nahahadit sinda na mawaran nin ganansya an saradit na mga negosyante asin nagtitinda sa merkado huli ta wara na nin pambakal an mga parabakal, na posibleng umabot sa mas dakulang krisis sa pinansyal o recession.
Bilang solusyon, ipigduon kaini an pangangaipo na maprotehiran an mga sakahan, magtagama nin bastanteng suplay nin tubig, asin tulos na ilipat an focus sa pagtatanom kan mga drought-resistant crops.
Padagos man an pakikipag koordinar kan saindang lado sa mga miyembro kaini ngani na enganyaron sindang lumipat muna sa mga alternatibong pananom siring kan ube asin cassava.
Paliwanag niya na an mga ini an bako maselan sa tubig asin mas hibaba an pangangaipo sa mahal na abono o pataba.
Dagdag pa kaini na mas difisil na ibusol an pagtatanom nin paroy sa ngunyan huli ta afuera sa kawaran nin patubig, mahal man an diesel para sa mga water pump, siring man an gastusin sa fertilizers asin pesticides.
“Ang magugutom ang mga magsasaka natin. Yung mga nagtataniom. Yung food producers natin ang maguguton.” pahayag ni Cabatbat sa intrevista kan sarong Bombo Radyo station.
Katakod kaini, nangapudan an grupo sa gobierno na magpaotob nin panghaluyan na programa asin marikas na aksyon ngani na dae dagos na mawara an produksyon kan pagkaon asin maagapan an pinaglalaoman na magabat na epekto kaini sa bilog na nacion.
