LEGAZPI CITY- Pinaghahandaan na kan mga pantalan sa rehiyong Bicol an pagruso kan mga biyahero na mauli sa saindang mga provincia katakod kan nagdadangadang na Undas.
Segun ki Port Management Office Bicol Media Relations Officer Achilles Galindes sa intrevista kan Bombo Radyo Legazpi na puon sa masunod na semana, pinaghahandaan na an pagpapaotob nin heightened alert status.
Ini an katakod kan paglatag kan Oplan Biyaheng Ayos katakod kan Undas.
Sinabi kan opisyal na magkakaigwa nin mga safety preparation asin security protocol ngani na maasegurar na salbado an mga namamanwaan sa saindang biyahe.
Katakod kaini an paglalatag nin dakol na security personnel ngani na masierto na warang makakapuslit na ano man na iligal na kontrabando sa mga pantalan sa rehiyon.
Marurumduman na tuyong panahon nin Undas o iba pang holiday break, komon na nagruruso an mga biyahero sa mga pantalan kan Bicol region, partikular na sa Matnog port – na pigkokunsiderar na pinakadakulang pantalan sa rehiyon.
Mientras tanto, mahigot man an pagirumdom kan mga opisyal sa mga biyahero na planunon nin matanos an saindang biyahe asin pairalon an ibayong pag-iingat.
