Pigreport kan National Meat Inspection Service (NMIS) Bicol an total na bilang kan mga accredited meat establishments sa rehiyon.
Segun ki Dr. Alex Templonuevo, Regional Director kan NMIS Bicol, igwa nin 10 “Double A” slaughterhouses asin 2 “Single A” slaughterhouses, kaiba an 8 poultry dressing plants, 6 meat distribution centers, 3 meat cutting plants, asin 4 cold storage warehouses.
Ipinaliwanag ni Templonuevo na an karne hale sa sarong “Single A” slaughterhouse pwede sanang ipabakal sa laog kan parehong banwaan o ciudad, mantang an karne hale sa “Double A” na pasilidad pwedeng i-transport sa bilog na probinsya, sa rehiyon, sagkod sa Mindanao.
Igwa man nin 56 na Locally Registered Meat Establishments sa bilog na rehiyon kan Bikol.
An mga bago asin modernong bunoan kabali an mga namumugtak sa Tabaco, Iriga, asin Legazpi City.
Mientrastanto, an Glacier Liberty Refrigeration sa Legazpi kabale sa mga darakulang cold storage warehouses sa rehiyon.
Igwa man nin 76 na bagong aplikasyon asin 221 na renewal application para sa akreditasyon kan mga lunadan sa pagdara nin karne.
Pigsierto kan NMIS Bicol na an gabos na karne na naglalaog sa merkado minaagi sa mahigot na audit kan mga food safety auditors para masiguro an kaligtasan kan mga konsumedores.
