LEGAZPI CITY—Arestado an sarong lalaki makalihis na makuwaan nin pigtutubudang marijuana sa ginibong Oplan Sita operation kan Legazpi City Police Station sa parte kan By-Pass Road sa Barangay Pawa, Legazpi City, pasado alas-5:30 nin hapon ngunyan na Domingo, Oktubre 11.
Binisto an suspek na si alyas “Boy,” nasa legal na edad, asin residente kan nasabing ciudad. Sinita ini kan kapulisan makalihis na manutaran suboot na warang sulog nin helmet mantang pigmamaneho an saiyang motor.
Basado sa report, niluwas kan suspek an saiyang pitaka kan hinapot na ipahiling an saiyang driver’s license, kun sain digdi aksidenteng nahulog an pigtutubudang dahon nin marijuana.
Makalihis an kasunod pang body search narekober pa digdi an duwang kadugangang pakete, kaya nasa tulong pakete nin pigtutubudang marijuana na nasa 20.16 gramos asin estimated standard drug price na P2,419 an nakumpiskar sa suspek.
Mientrastanto, dinara na an nasabing persona sa Legazpi CPS para sa magkakanigong dokumentasyon asin mga naaangkop na prosesong legal.
