LEGAZPI CITY-Tulong indibidwal, kabali an duwang aki, an nagadan, mantang an saro milagrosong nakaligtas makalihis na an pagrasay nin daga nagresulta sa pagkalubong kan sarong harong sa Sitio Riverside, Barangay Pulangbato, Cebu City, kan suudma, Oktubre 9.
An mga biktima sarong 60-anyos asin duwang aki na edad 5-anyos, mantang an solong survivor sarong 38-anyos na padagos na pigbubulong sa ospital.
Segun sa Cebu City Councilor na si Dave Tumulak, na sasaguton kan gobierno kan ciudad an gabos na gastos kan mga biktima siring man an pagpapabulong kan nasabing survivor.
Pigduon kan konsehal na nagresulta nin matinding huma sa emergency responder asin residentes an padagos na pag-uuran sa lugar.
Huli sa peligro sa landslide, temporaryong pig-ebakwar sa Barangay Pulangbato Gymnasium an 35 pamilya mantang nagpapadagos an opisyal kan Mines and Geosciences Bureau (MGB-7) sa pagbusisi kan landslide risk level sa nasambitang lugar.
