LEGAZPI CITY-Kinumpirmar kan sarong Weather Specialist an paglaog kan Amihan season ngonian na enot na semana kan Oktubre mantang pinaglalaoman naman an epekto kan pig-aapod nindang “Very strong El Niño” sa bilog na nacion.
Segun ki Weather Specialist Christian Allen Torevillas, sa intrevista kan Bombo Radyo Legazpi na patapos na an epekto kan Hanging Habagat sa nacion asin padiit-diit nang mag-iiba an pattern kan panahon kun sain an Hanging Amihan naman, nagikan sa dagat pasipiko an maeeskperyensyahan kan nacion sa mga masunod na aldaw asin bulan.
Nangyayari suboot ini enkaso magluwas na an Hanging Amihan na hale sa Syberia.
Mientras tanto, kasabay kaini an paglaog naman kan pinagbabantayang epekto kaini sa nacion.
Paliwanag ni Torevillas, na enkaso igwang El Niño, mas kadikit an namamateang Amihan.
Kun kaya nagpatanid an opisyal na padagos na magbantay sa pagbabago kan klima, orog an pinaglalaoman na mamatean an moderato hasta makusog na epekto kan El Niño ngonian na bulan asin magpapadagos hasta sa enot asin ikaduwang kwarter sa masunod na taon.
Nagpatanid man an opisyal na posibleng magin record breaking ini kun kaya pinag-aandaman na ninda an epekto kaini sa nacion.
Sinabi man kaini na poon ngonian na bulan sagkod sa masunod na taon, makakaeksperyensya sana nin below-normal hasta way-below normal na pag-uuran sa nacion.
