LEGAZPI CITY—Kalaboso an sarong drug personality sa ginibong buy-bust operation sa Barangay 39-Bonot, Legazpi City, Albay.
Binisto an nasabing indibidwal na si alyas “Buddy”, nasa legal na edad, may agom asin residente kan naunambitang lugar.
Nakumpiskar digdi an duwang nakabuhol na plastic sachets na may laog nin pigtutubudang shabu na may kabilogang 100 gramos asin standard drug price P680,000 kaiba an buy-bust asin boodle money.
Kinundusir an operasyon kan mga operatiba kan Philippine Drug Enforcement Agency Albay Provincial Office (lead unit), katabang an PDEA Regional Office 5 Intelligence and Investigation Section, PDEA RO5 Special Enforcement 1, Albay Provincial Intelligence Unit, Regional Maritime Unit 5 Regional Special Operations Team, Coast Guard Intelligence Unit Albay asin Legazpi City Police Station.
Mahahampang an suspek sa kasong pagbayolar sa Republic Act No. 9165 o Comprehensive Dangerous Drugs Act of 2002.
Sa presente nasa kustodiya na ini kan PDEA Albay Provincial Office para sa magkakanigong disposisyon.
