LEGAZPI CITY-Gadan an nasa 27 katawo sa duwang magkasuhay na pambabadil sa South Africa kan Setyembre 26 asin 27.
An lokal na pulis naireport na 17 katawo an nagadan asin labing 15 an nairido kan Sabadong banggi pakatapos na walong suspetsado—na armado nin mga riple asin pistol na AK-47—an nagpaputok sa sarong bar harani sa Johannesburg.
Sa separadong report kan pulisya, 10 katawo an nagadan asin 11 an nairido sa sarong tindahan sa Cape Town kasunod kan pambabadil kan mga dai nabibistong suspetsado.
An pangyayaring iyan nangyari kan amay na oras kan Domingo, pirang oras sana makalihis an enot na pagreport kan pambabadil.
Susog ki Gauteng Province Police Commissioner Lt. Gen. Tommy Mthombeni, an mga enot na imbestigasyon posibleng motibo an paghabon huli sa nawawarang pagsasadiri kan mga biktima.
Padagos man na nag-iimbestigar an pulisya kan South Africa kun igwang koneksyon an magkasuhay na mga krimen.
Apat na aldaw antes an duwang trahedyang ini, labing 11 katawo—kaiba an sarong bados na babae—an nagadan man sa saro pang pambabadil kan sakyadahon nin armadong mga lalaki an sarong party sa Durban, South Africa.
Mientras tanto, saro sa mga isyu na nagpapasakit sa South Africa, iyo an ilegal na pagmimina sa mga inabandonang lugar, kun saen an mga minero na imbuelto digdi, mga bako dokumentong migrante na suboot pig-recruit kan mga organisadong gang nin krimen.
An nacion nakikipaglaban man sa sarong dekada nang problema manungod sa huma nin mga ilegal na badil asin kadahasan, na naggagadan nin pigkakarkulong 60 buhay urualdaw sa South Africa.
