LEGAZPI CITY-Nagtalaan an Department of Agriculture (DA) nin deadline sagkod sa katapusan kan taon para sa mandatoryong pagrehistro kan gabos na bodega asin pasilidad na nag-iimbak nin mga produktong agrikultural asin pangisdaan.
Segun sa ahensya, kaipuhan na matapos an registration asin mga kinakaipuhan na rekisitos sa Disyembre 31 ngonian na taon.
An pagrehistro ginigibo sa paagi kan Registry System for Agri Storage (RSAS), sarong sentralisadong plataporma para sa imbentaryo asin lokasyon kan mga nakaimbak na produkto.
Obheto kan sistema na matabangan an gobierno na makua an tamang datos sa volume kan mga imported na produktong agrikultural, partikularmente an paroy.
An direktiba na ini sakop kan Republic Act No. 12022, o an Anti-Agricultural Economic Sabotage Act, na igwang katuyuhan na pugulan an smuggled, hoarding, asin iba pang ilegal na aktibidad sa merkado.
Sa irarom kan ley asin DA Memorandum Circular No. 3, s. 2026, an mga kagsadiri nin pasilidad kaipuhan na magparehistro asin magmantenir nin tamang mga rekord sa laog nin limang taon.
Nilinaw man kan ahensya na an registration, laen sa inspeksyon, asin nakatalaan na nationwide schedule para sa pagbantay kan pasilidad sa taong 2027.
