LEGAZPI CITY—Binawian nin buhay an sarong 27-anyos na lalaki makalihis tamaan nin kikilat sa Old Port, Purok-1, Barangay Bigaa, Legazpi City.
Segun ki Legazpi City Police Station Chief-of-Police Police Lieutenant Colonel Aldin Balagat, sa intrevista kan Bombo Radyo Legazpi, an biktima sarong estudyante asin residente kan banwaan nin Sto. Domingo, Albay.
Sa salaysay kan mga barkada na pig-agda kuta ninda na maglangoy an biktima.
Nagtinir na nagsisira ini durante kan pagkidlat digdi na nahiling kan mga barkada na nakalumpasay an biktima sa may semento kan seawall.
Nagsapo an biktima nin mga lugad sa saiyang bitis na epekto kan pagtama kan kidlat.
Sinabi man kan opisyal na dead on the spot an biktima makalihis tamaan nin kidlat.
Mientras tanto, nagpagiromdom man si Balagat sa namamanwaan na maghanap nin masisirungan durante kan mga pagkikidlat nganing malikayan an siring na mga insidente.
