LEGAZPI CITY-Binangga suboot kan China Coast Guard (CCG) an Bureau of Fisheries and Aquatic Resources (BFAR) vessel na BRP Datu Magat Salamat ngonian na Biyernes, Setyembre 18, sa baybayon kan Palawan mantang naghahatod ini nin fuel assistance sa mga Pilipinong parasira sa West Philippine Sea.
Segun sa Philippine Coast Guard (PCG), nagkawsa nin danyos sa starboard (tuo) na lado kan BFAR vessel an banggaan.
Huli kan insidente, an mga railings, metal support, deck fixture, asin iba pang kagamitan kan barko an nabaluktot, natanggal, asin nahale sa puwesto.
Nangyari an banggaan sarong aldaw sana makalihis na matrayumpong mapalataw liwat an BRP Datu Magat Salamat kasunod kan pag-ground kaini sa Hasa-Hasa Shoal.
An BRP Datu Magat Salamat nagsasagibo nin misyon nin gobierno sa fuel subsidy sa irarom kan proyektong KBBM para sa mga lokal na parasira kan mangyari an insidente.
Padagos na pigbabantayan kan mga otoridad an kamugtakan kan mga tripulante asin kan sakayan pandagat mantang nakikipagkoordinar sa mga katakod na ahensya mapadapit sa mga masunod na lakdang.
